2025-26 അധ്യയന വർഷത്തേക്കുള്ള എഞ്ചിനിയറിങ്, ആർക്കിടെക്ചർ, ഫാർമസി, മെഡിക്കൽ, അനുബന്ധ കോഴ്സുകളിലെ പ്രവേശന അപേക്ഷകളിലെ തെറ്റുകൾ പരിഹരിക്കാൻ അവസരം. രേഖകളിൽ ന്യൂനതകളുള്ളവരുടെ ലിസ്റ്റ് പ്രവേശന പരീക്ഷ കമ്മിഷണറുടെ www.cee.kerala.gov.in വെബ്സൈറ്റിൽ ലഭ്യമാണ്. ന്യൂനതകൾ പരിഹരിക്കുന്നതിനുള്ള രേഖകൾ ഓൺലൈനായി അപ്ലോഡ് ചെയ്യാനുള്ള അവസാന തീയതി 2025 ജൂൺ 2 ആണ്.
നിർദിഷ്ട സമയപരിധിക്കുള്ളിൽ നേറ്റിവിറ്റി രേഖകളിലെ ന്യൂനതകൾ പരിഹരിക്കാത്തവരുടെ സാമുദായിക, പ്രത്യേക സംവരണാനുകൂല്യങ്ങൾ റദ്ദാകും. എൻആർഐ ഒഴികെയുള്ള സംവരണ വിഭാഗങ്ങളിൽ അപേക്ഷിച്ച വിദ്യാർഥികളുടെ രേഖകളിലാണ് പ്രധാനമായും ന്യൂനതകൾ കണ്ടെത്തിയിരിക്കുന്നത്. വിദ്യാർഥികൾക്ക് അവരുടെ അപേക്ഷ നമ്പർ, പാസ്വേഡ് എന്നിവ ഉപയോഗിച്ച് ‘KEAM 2025 Candidate Portal’-ൽ ലോഗിൻ ചെയ്ത് പിഴവുകൾ തിരുത്താം. പ്രൊഫൈൽ പേജിലെ ‘Memo Details’ മെനുവിൽ ന്യൂനതകളുടെ വിശദാംശങ്ങൾ ലഭ്യമാണ്.
