ചെങ്ങോട്ടുകാവ്: ഈ വർഷത്തെ ത്രിമൂർത്തി സംഗീതോത്സവം അഷ്ടപദി, പഞ്ചരത്ന കീർത്തനാലാപനo, ഗുരുസ്മരണ, കഥകളി സംഗീതാർച്ചന, ശാസ്ത്രീയ സംഗീത കച്ചേരി തുടങ്ങിയ പരിപാടികളോടെ മെയ് 18-ന് ചെങ്ങോട്ടുകാവ് ശ്രീരാമാനന്ദാശ്രമം ഓഡിറ്റോറിയത്തിൽ നടക്കുമെന്ന് കൺവീനർ കലാനിലയം ഹരി അറിയിച്ചു. വാഗ്വേയകാരന്മാരായ ത്രിമൂർത്തികളെയും, അന്തരിച്ച കലാമണ്ഡലം നീലകണ്ഠൻ നമ്പീശൻ ആശാനടക്കമുള്ള കഥകളി സംഗീതജ്ഞരെയും, അനുസ്മരിച്ചുകൊണ്ടുള്ള പരിപാടികൾക്ക് ഇത്തവണ മുൻതൂക്കം നൽകുമെന്ന് അറിയിപ്പിൽ വ്യക്തമാക്കി.
മെയ് 18ന് കാലത്ത് എട്ടുമണിക്ക് അഷ്ടപദിയോടെ ഉത്സവത്തിന് തുടക്കമാകും. 9 മണിക്ക് പ്രഗൽഭ സംഗീതജ്ഞർ പങ്കെടുക്കുന്ന പഞ്ചരത്ന കീർത്തനാലാപനത്തിന്റെ പശ്ചാത്തലത്തിൽ കലാമണ്ഡലം നാരായണൻ നമ്പീശൻ ഭദ്രദീപം കൊളുത്തി ഔപചാരിക ഉദ്ഘാടനം നിർവഹിക്കും. കാലത്ത് 10 30 ന് നടക്കുന്ന ഗുരുസ്മരണയിൽ വിട്ടുപിരിഞ്ഞ പ്രഗത്ഭരായ കഥകളി സംഗീതജ്ഞരെക്കുറിച്ച് സഹപ്രവർത്തകരും ശിഷ്യരും അനുഭവങ്ങൾ പങ്കുവയ്ക്കും. കലാമണ്ഡലം ഉണ്ണികൃഷ്ണക്കുറുപ്പ്, കലാമണ്ഡലം രാമൻകുട്ടി വാര്യർ, കലാമണ്ഡലം രാജേന്ദ്രൻ, കലാമണ്ഡലം ശങ്കരൻ എമ്പ്രാന്തിരി, കലാമണ്ഡലം രവീന്ദ്രൻ, കോട്ടക്കൽ വാസു നെടുങ്ങാടി, പരമേശ്വരൻ നമ്പൂതിരി, കലാമണ്ഡലം ഗംഗാധരൻ, കലാ ഹൈദരലി, കലാ ഹരിദാസ്, സദനം ജ്യോതി, തിരൂർ നമ്പീശൻ എന്നിവരെക്കുറിച്ച് പാലനാട് ദിവാകരൻ, കലാമണ്ഡലം ഗോപാലകൃഷ്ണൻ, കലാമണ്ഡലം മോഹന കൃഷ്ണൻ, കലാമണ്ഡലം ബാബു നമ്പൂതിരി, കോട്ടക്കൽ നാരായണൻ, സദനം ശ്യാമളൻ, ശ്രീ മോഹനൻ എന്നിവർ അനുഭവങ്ങൾ പങ്കുവയ്ക്കും. തുടർന്ന് സംസ്ഥാന സ്കൂൾ കലോത്സവം, യൂണിവേർസിറ്റി കലോത്സവം എന്നിവയിൽ പങ്കെടുത്തവരെ അനുമോദിക്കും. വൈകീട്ട് 3:30 മുതൽ കഥകളി സംഗീത ആരാധന, ശാസ്ത്രീയ സംഗീത ആരാധന എന്നിവ നടക്കും. വൈകിട്ട് ആറുമണിക്ക് നടക്കുന്ന സംഗീതവിരുന്നിൽ വിഷ്ണുദേവ നമ്പൂതിരിയുടെ കച്ചേരി അരങ്ങേറും. ബിജു എസ് ആനന്ദ് (വയലിൻ), കൃപാൽ സായിറാം (മൃദംഗം), വെള്ളാറ്റഞ്ഞൂർ ശ്രീജിത്ത് (ഘടം), പയ്യന്നൂർ ഗോവിന്ദ പ്രസാദ് (മുഖർശംഖ്) എന്നിവർ പശ്ചാത്തലം ഒരുക്കും.
