ചേലിയ കഥകളി വിദ്യാലയത്തിൽ കഥകളി പഠന ശിബിരത്തിന് വർണ്ണാഭമായ തുടക്കമായി

ചേലിയ കഥകളി വിദ്യാലയത്തിൽ 14 ദിവസം നീണ്ടു നിൽക്കുന്ന കഥകളി പഠന ശിബിരത്തിന് തുടക്കമായി. ഗുരുപൂജാ പുരസ്കാര ജേതാവ് പ്രശസ്ത താളവാദ്യ കലാകാരൻ ശിവദാസ് ചേമഞ്ചേരി ഉദ്ഘാടനം ചെയ്തു. ഏപ്രിൽ 17 മുതൽ മെയ് 1 വരെ നടക്കുന്ന ശിബിരത്തിൽ ദിവസവും രാവിലെ 9 മണി മുതൽ വൈകീട്ട് 5.30 വരെ കഥകളിയുമായി ബന്ധപ്പെട്ട വിവിധ വിഷയങ്ങളിൽ പ്രായോഗിക പരിശീലനങ്ങൾ ഉൾപടെയുള്ള ക്ലാസുകൾ നടക്കും. കഥകളി വേഷം, ചെണ്ട, സംഗീതം, ചുട്ടിയും കോപ്പു നിർമ്മാണവും എന്നിവ കൂടാതെ ഓട്ടൻ തുള്ളലിലും വിദഗ്ദ്ധർ പരിശീലനം നല്കും. ക്യാമ്പ് ദിവസങ്ങളിൽ ഒരു ദിവസത്തെ ഉല്ലാസ യാത്ര ഇത്തവണത്തെ ശിബിരത്തിന്റെ സവിശേഷതയാണ്. ദിവസവും വൈകീട്ടു നടക്കുന്ന പരിചയ സമ്പർക്ക പരിപാടികളിൽ പ്രമുഖർ വിദ്യാർത്ഥികളുമായി സംവദിക്കും. ഉദ്ഘാടന സമ്മേളനത്തിൽ കഥകളി വിദ്യാലയം പ്രിൻസിപ്പാൾ കലാമണ്ഡലം പ്രേംകുമാർ അധ്യക്ഷത വഹിച്ചു.
എൻ.കെ.ശശി സ്വാഗതമാശംസിച്ചു. കലാമണ്ഡലം ശിവദാസ്, കലാനിലയം ഹരി, മിനി രാജൻ, ഇ.ശ്രീധരൻ എന്നിവർ സംസാരിച്ചു.