വിരമിച്ച ഹൈക്കോടതി ജഡ്ജിയില് നിന്നും ഓണ്ലൈനായി 90 ലക്ഷം തട്ടിയെടുത്ത കേസില് കോഴിക്കോട് വടകര സ്വദേശികളായ മിര്ഷാദ്, മുഹമ്മദ് ഷര്ജില് എന്നിവരെ കൊച്ചി സൈബര് പൊലീസ് പിടികൂടി. തൃപ്പൂണിത്തുറ എരൂര് അമൃത ലെയ്ന് സ്വപ്നത്തില് ശശിധരന് നമ്പ്യാര്ക്കാണ് പണം നഷ്ടമായത്. ഓണ്ലൈന് ട്രേഡിങ് വഴി 850 ശതമാനം ലാഭം വാഗ്ദാനം ചെയ്തായിരുന്നു തട്ടിപ്പ്.
കംബോഡിയ, ചൈന കേന്ദ്രീകരിച്ചുള്ള സൈബര് തട്ടിപ്പ് സംഘങ്ങളുമായി പ്രതികള്ക്ക് ബന്ധമുണ്ടെന്നാണ് പൊലീസ് പറയുന്നത്. കേസില് ആറ് പ്രതികളുണ്ടെന്നാണ് പൊലീസ് പറയുന്നത്. ഈ സംഘങ്ങളില് നിന്ന് പ്രതിഫലമായി 30 ലക്ഷം രൂപ ഇവര്ക്ക് കിട്ടിയതായും പൊലീസ് പറഞ്ഞു. തുടര്ന്ന് നടത്തിയ അന്വേഷണത്തില് സംസ്ഥാനത്ത് ഇവരാണ് ഇടനിലക്കാരായി പ്രവര്ത്തിക്കുന്നതെന്നും പൊലീസ് കണ്ടെത്തി.
ആദിത്യ ബിര്ള ഇക്വിറ്റി ലേണിങ് എന്ന പേരിലുള്ള ഓഹരിവിപണി സംബന്ധിച്ച വാട്സാപ്പ് ഗ്രൂപ്പില് റിട്ട. ജഡ്ജിയെ അംഗമാക്കിയിരുന്നു. തുടര്ന്ന് പണം നിക്ഷേപിച്ചാല് 850 ശതമാനം ലാഭം ലഭിക്കുമെന്ന വാഗ്ദാനമുണ്ടായി. ഗ്രൂപ്പില് തന്നെ പങ്കുവെച്ച ലിങ്കിലേക്ക് ജഡ്ജി പണം കൈമാറുകയും ചെയ്തു. ഇത്തരത്തില് കഴിഞ്ഞ വര്ഷം ഡിസംബര് നാലിനും 30-നും ഇടയ്ക്ക് ജഡ്ജിയുടെ പല അക്കൗണ്ടുകളില് നിന്നായി 90 ലക്ഷം രൂപ തട്ടിപ്പുകാര് കൈക്കലാക്കി. പക്ഷേ വാഗ്ദാനം ചെയ്ത ലാഭവിഹിതമോ, നല്കിയ പണമോ തിരികെ ലഭിച്ചില്ല. തുടര്ന്ന് തൃപ്പൂണിത്തുറ ഹില്പ്പാലസ്പൊലീസ് സ്റ്റേഷനില് ഈ മാസം അഞ്ചിന് പരാതി നല്കിയതിനെ തുടര്ന്ന് കേസ് സൈബര് പൊലീസിന് കൈമാറുകയായിരുന്നു.
