പരിശുദ്ധ റമദാൻ സഹനത്തിന്റെയും കാരുണ്യത്തിന്റെയും കാലമെന്ന് ബെന്നി ബെഹനാൻ എംപി പറഞ്ഞു. ദുബായിൽ ഉമ്മൻ ചാണ്ടി കൾച്ചറൽ ഫോറത്തിന്റെ ആഭിമുഖ്യത്തിൽ നടത്തിയ ഇഫ്താർ സംഗമത്തിന്റെ ഉദ്ഘാടന പ്രസംഗത്തിൽ സംസാരിക്കുകയായിരുന്നു അദ്ദേഹം. ഉമ്മൻ ചാണ്ടി കൾച്ചറൽ ഫോറം ചെയർമാൻ നദീർ കാപ്പാട് അധ്യക്ഷത വഹിച്ചു. ഉമ്മൻ ചാണ്ടി കൾച്ചറൽ ഫോറത്തിന് കീഴിലുള്ള പ്രഥമ ജീവകാരുണ്യ പുരസ്കാരം സിറാജ്ജുദ്ധീൻ മുസ്തഫ ഏറ്റുവാങ്ങി.
ഉമ്മൻ ചാണ്ടി ഏറ്റെടുത്ത് നടത്തിയ സാമൂഹിക പദ്ധതികൾ ഓരോന്നും ജനമസ്സിൽ വലിയൊരു സ്ഥാനമാണ് അദ്ദേഹത്തിന് ലഭിച്ചതെന്നും മരണശേഷവും ജനമനസ്സിൽ ഉമ്മൻ ചാണ്ടി ജീവിച്ചിരിക്കുന്നു എന്നും ബെന്നി ബെഹനാൻ പറഞ്ഞു. ഉമ്മൻചാണ്ടിയുടെ വിയോഗം ഉണ്ടാക്കിയ വിടവ് നികത്താൻ കാലാന്തരങ്ങളോളം കാത്തിരുന്നാലും സാധിക്കുകയില്ല. അധികാര ഗർവ്കൊണ്ടല്ലാതെ സ്നേഹംകൊണ്ടും തന്റെ സമീപനം കൊണ്ടും ഒരു സമൂഹത്തെ എങ്ങനെ വളർത്തികൊണ്ട് വരാൻകഴിയുമെന്നും എന്നും ഉമ്മൻ ചാണ്ടി നമുക്ക് കാണിച്ചു തന്നു, ഒരു ഭരണകർത്താവിന് തന്റെ മൂല്യബോധം കൊണ്ട് ഒരു നാടിനെ എങ്ങനെ നയിക്കാൻ കഴിയുമെന്നതിന്റെ ജീവിച്ചിരിക്കുന്ന ഉദാഹരണമാണ് ഉമ്മൻ ചാണ്ടി.
ആൾക്കൂട്ടം എന്നും ഉമ്മൻ ചാണ്ടിക്ക് ആവേശം ആയിരുന്നു, ആൾക്കൂട്ടത്തിൽ നിന്നാണ് അദ്ദേഹത്തിന് ജീവവായു ലഭിച്ചിരുന്നത്. ജീവിതത്തിന്റെ നാനാതുറകളിൽ പ്രവർത്തിക്കുന്നവർക്ക് ഉമ്മൻ ചാണ്ടിയുടെ നിസ്വാർത്ഥ സേവനത്തിലൂടെ ഇന്നും ഊർജമായി ജീവിക്കുകയാണ് ഉമ്മൻ ചാണ്ടി എന്നും ബെന്നി ബഹന്നാൻ പറഞ്ഞു.
തന്റെ രാഷ്രീയ ജീവിതത്തിൽ പല സ്ഥാനങ്ങളിലും പ്രവർത്തിക്കുവാൻ സാധിച്ചു എങ്കിലും അതിനേക്കാൾ ഭാഗമായി താൻ കരുതുന്നത് ഉമ്മൻ ചാണ്ടി എന്ന മനുഷ്യസ്നേഹിയുമായുള്ള സൗഹൃദത്തെയാണ് എന്നും അദ്ദേഹം പറഞ്ഞു.
ദുബായിൽ സാമൂഹിക സാംസ്കാരിക മേഖലയിൽ പ്രവർത്തിക്കുന്ന നിരവധി പേര് നോമ്പ്തുറയിൽ പങ്കെടുത്തു. നൗഫൽ കല്ലിങ്ങൽ, റഹീസുദ്ധീൻ, മുസ്തഫ ദാരിമി,ഹൈദർ തട്ടത്താഴത്ത്, ജെബിൻ ഇബ്രാഹിം,ആരിഫ് ഒറവിൽ, ലത്തീഫ് എം എൻ, നാസർ നാലകത്ത്,നൂറുൽ ഹമീദ്, ബിബിൻ ജേക്കബ്, റിയാസ് മുണ്ടേരി, സജീർ ഏഷ്യാട്, പോൾ ജോർജ്, എന്നിവർ സംസാരിച്ചു. മുനീർ കുംബ്ലെ സ്വാഗതവും ജേക്കബ് പത്തനാപുരം നന്ദിയും പറഞ്ഞു.
