കൊയിലാണ്ടി താലൂക്ക് ആസ്ഥാന ആശുപത്രിയിൽ സ്ത്രീ രോഗ വിഭാഗത്തിൽ Colposcopy പരിശോധന ആരംഭിച്ചു. കൊയിലാണ്ടി നഗരസഭയുടെയും എച്ച്.എം.സിയുടെയും പിന്തുണയോടെ ആണ് പദ്ധതി നടപ്പാക്കുന്നത്. ആശുപത്രിയിലെ ഡോ. രാജശ്രീ, ഡോ. ദിവ്യ എന്നിവരാണ് ഇതിന് നേതൃത്വം നൽകുന്നത്.
ഗർഭാശയമുഖത്തിന്റെ (cervix ) സൂക്ഷ്മ പരിശോധനയാണ് ഇതിലൂടെ സാധ്യമാകുന്നത്. ഗർഭാശയമുഖത്തിലെ അസാധാരണമായ വളർച്ചകൾ, ഹ്യുമൻ പാപ്പിലോമ വൈറസ് ബാധ (HPV) , ഗർഭാശയമുഖ കാൻസർ തുടങ്ങിയ ഗുരുതരമായ അസുഖങ്ങൾ പ്രാരംഭഘട്ടത്തിൽ തന്നെ കണ്ടുപിടിക്കുന്നതിന് ഈ പരിശോധന വളരെ ഉപകാരപ്രദമാണ്. ഇതുവഴി ഇത്തരം മാരകമായ അസുഖങ്ങൾ വരാതെ തടയുന്നതിനും വന്നാൽ തുടക്കത്തിൽ തന്നെ മനസ്സിലാക്കി ഫലപ്രദമായ ചികിത്സ ഏർപ്പെടുത്തുന്നതിനും സാധ്യമാകും.
