കൊയിലാണ്ടി രാഷ്ട്രീയ-സാംസ്കാരിക രംഗങ്ങളിൽ നിറസാന്നിധ്യവും പ്രഭാഷകനും ഗ്രന്ഥശാലാ പ്രവർത്തകനുമായ കന്മന ശ്രീധരൻ മാഷുടെ ലേഖനങ്ങളുടെയും പ്രഭാഷണങ്ങളുടെയും സമാഹാരം ‘കാവൽക്കാരനെ ആരു കാക്കും ‘ പ്രകാശനം ചെയ്തു. ദേശാഭിമാനി ചീഫ് എഡിറ്റർ പുത്തലത്ത് ദിനേശൻ സി.പി.ഐ.എം ജില്ലാ സെക്രട്ടറി എം.മെഹബൂബിന് പുസ്തകം നൽകി പ്രകാശനം ചെയ്തു. സംഘാടക സമിതി ചെയർമാൻ കെ കെ മുഹമ്മദ് അധ്യക്ഷനായി. പ്രശസ്ത കഥാകൃത്ത് അശോകൻ ചരുവിൽ മുഖ്യാതിഥിയായി. ദേശാഭിമാനി വാരിക പത്രാധിപരും പുരോഗമന കലാസാഹിത്യ സംഘം സംസ്ഥാന പ്രസിഡണ്ടുമായ ഡോ കെ.പി മോഹനൻ സംസാരിച്ചു. പുരോഗമന കലാസാഹിത്യ സംഘം കൊയിലാണ്ടി മേഖലാ കമ്മിറ്റിയുടെ പ്രസിദ്ധീകരണ വിഭാഗമായ ‘ബദ്ലാവ് പബ്ലിക്കേഷൻസ് ‘ കന്മന ശ്രീധരൻ ഉദ്ഘാടനം ചെയ്തു. ചടങ്ങിൽ കാനത്തിൽ ജമീല എം.എൽ.എ കന്മനയെ പൊന്നാടയണിയിച്ചു. മോഹനൻ, കെ.കെ മുഹമ്മദ് എന്നിവർ ചേർന്ന്‌ ചിത്രസമർപ്പണം നടത്തി. പു.ക.സ ജില്ലാ സെക്രട്ടറി ഡോ. ഹേമന്ത്കുമാർ, നോവലിസ്റ്റ് റിഹാൻ റാഷിദ്, പി വിശ്വൻ, ടി.കെ ചന്ദ്രൻ തുടങ്ങിയവർ പങ്കെടുത്തു.
വയലാർ പുരസ്ക്കാരം ലഭിച്ച അശോകൻ ചരുവിലിനെ ചടങ്ങിൽ ആദരിച്ചു. സുരേഷ് ഉണ്ണി, പദ്മിനി നെടുളി, ഡോ മോഹനൻ നടുവത്തൂർ തുടങ്ങിയവരെ ആദരിച്ചു. ‘ബദ് ലാവി’ൻ്റെ ആദ്യഗ്രന്ഥമാണ് ‘കാവൽക്കാരനെ ആരു കാക്കും’. പരിപാടിയുടെ തുടക്കം കുറിച്ച് കേളി, ബാംസുരി തുടങ്ങിയവ അവതരിപ്പിച്ചു. മധു കിഴക്കയിൽ സ്വാഗതവും ആർ.കെ ദീപ നന്ദിയും പറഞ്ഞു.
