എസ്.എസ്.എൽ.സി , ഹയർ സെക്കണ്ടറി പരീക്ഷ തുടങ്ങുന്ന ദിവസം ബസ് പണിമുടക്കുമായി തൊഴിലാളികൾ

കൊയിലാണ്ടി: കോഴിക്കോട് കൊയിലാണ്ടി റൂട്ടിൽ മാർച്ച് മൂന്നിന് തിങ്കളാഴ്ച സംയുക്ത ട്രേഡ് യൂണിയൻ നേതൃത്വത്തിൽ ബസ് തൊഴിലാളികൾ സൂചനാ പണിമുടക്ക് നടത്തും .ഒരാഴ്ച മുമ്പ് കീഴൂർ പള്ളിക്കര – കോഴിക്കോട് റൂട്ടിൽ സർവീസ് നടത്തുന്ന ബ്രീസ് ബസ്സിലെ ഡ്രൈവറെ പുതിയ ബസ് സ്റ്റാൻഡിൽ വച്ച് ഏതാനും പേർ മർദ്ദിച്ചിരുന്നു.ചെങ്ങോട്ടുകാവിൽഇരുചക്രവാഹനക്കാർക്ക് സൈഡ് കൊടുക്കാത്ത വിഷയത്തിൽ ആയിരുന്നു മർദ്ദനം. ഈ സംഭവത്തിൽ പ്രതികളെ ആരെയും അറസ്റ്റ് ചെയ്യാത്ത പോലീസ് നടപടിയിൽ പ്രതിഷേധിച്ചാണ് സംയുക്ത ട്രേഡ് യൂണിയൻ നേതൃത്വത്തിൽ തൊഴിലാളികൾ സമരം പ്രഖ്യാപിച്ചിരിക്കുന്നത്. എന്നാൽ തിങ്കളാഴ്ച എസ്.എസ്.എൽ.സി. ഹയർ സെക്കൻഡറി പരീക്ഷ തുടങ്ങുന്ന വേളയിലാണ് ബസ്സുകളുടെ ഈ സമരം. കോഴിക്കോട് കൊയിലാണ്ടി റൂട്ടിൽ യാത്ര ചെയ്യേണ്ട നൂറുകണക്കിന് വിദ്യാർത്ഥികൾക്കും പരീക്ഷാ ജോലിക്ക് എത്തേണ്ട അധ്യാപകർക്കും പൊതുജനങ്ങൾക്കും ബസ്സുകാരുടെ ഈ സൂചനാ പണിമുടക്ക് കടുത്ത പ്രയാസം ഉണ്ടാക്കും.വിദ്യാർഥികളുടെ പ്രയാസമൊർത്തെങ്കിലും ബസ് പണിമുടക്ക് മാറ്റിവെക്കണമെന്നാണ് രക്ഷിതാക്കളുടെയും യാത്രക്കാരുടെയും ആവശ്യം.ഇക്കാര്യത്തിൽ പോലീസും മോട്ടോർ വാഹന വകുപ്പ് അധികൃതരും രാഷ്ട്രീയ പാർട്ടി നേതാക്കളും കൊയിലാണ്ടി നഗരസഭയും ഇടപെടണമെന്നാണ് നാട്ടുകാരുടെ ആവശ്യം.