കോഴിക്കോട് ഗവണ്മെന്റ് ലോ കോളേജ് വിദ്യാര്ത്ഥിനിയുടെ ആത്മഹത്യയിൽ ദുരൂഹതയാരോപിച്ച് കുടുംബം രംഗത്തെത്തി. കഴിഞ്ഞ തിങ്കളാഴ്ചയാണ് തൃശ്ശൂര് സ്വദേശിനിയായ മൗസ മെഹ്റിസിനെ (20) കോവൂരിലെ താമസ സ്ഥലത്ത് തൂങ്ങിമരിച്ച നിലയില് കണ്ടത്. മൃതദേഹത്തില് മറ്റ് പരിക്കുകള് ഇല്ലാത്തതിനാല് ആത്മഹത്യയാണെന്ന നിഗമനത്തില് പൊലീസ് എത്തുകയായിരുന്നു. പെൺകുട്ടിയുടെ മൊബൈൽ ഫോൺ കണ്ടെത്താൻ സാധിച്ചിട്ടില്ലെന്ന് പിതാവ് അബ്ദുൾ റഷീദ് അറിയിച്ചു.
ഫെബ്രുവരി 15നാണ് അവസാനമായി മൗസ തൃശ്ശൂരിലെ വീട്ടില് എത്തിയത്. 17ന് ഹോസ്റ്റലിലേക്ക് തിരിച്ച് പോവുകയും ചെയ്തു. മാര്ച്ച് 13ന് മുന്പായി സ്റ്റഡി ലീവിന്റെ ഭാഗമായി തിരികെ എത്തുമെന്നും മൗസ വീട്ടുകാരോട് പറഞ്ഞിരുന്നു. എന്നാല് മരിച്ചതിന്റെ തലേദിവസം മൗസയുടെ ആണ്സുഹൃത്തുമായി തര്ക്കമുണ്ടായതായും മൗസയുടെ ഫോണ് ഇയാള് കൊണ്ടുപോയതായും സഹപാഠികള് മൊഴി നല്കിയിട്ടുണ്ട്. ഇയാളെ കണ്ടെത്താനുള്ള ശ്രമത്തിലാണ് പൊലീസ്. മൗസയുടെയും ആണ്സുഹൃത്തിന്റെയും ഫോണ് ചൊവ്വാഴ്ച മുതല് സ്വിച്ച്ഡ് ഓഫ് ആണെന്ന് പൊലീസ് പറഞ്ഞു.
