താമസിക്കാൻ സ്വന്തമായി വീടില്ലാത്ത കുടുംബത്തിന് വീട് വെയ്ക്കാന് ഡേറ്റാ ബാങ്കില്പ്പെട്ടാലും നെല്വയല്-തണ്ണീര്ത്തട പരിധിയില്പ്പെട്ടാലും പഞ്ചായത്തോ നഗരസഭയോ അനുമതി നല്കേണ്ടതാണെന്ന് മുഖ്യമന്ത്രി പിണറായി വിജയന്. ഗ്രാമപഞ്ചായത്തില് 10 സെന്റും നഗരത്തില് അഞ്ച് സെന്റും സ്ഥലത്ത് വീട് വെയ്ക്കാനാണ് അനുമതി നൽകേണ്ടത്.
അര്ഹതപ്പെട്ടവര്ക്ക് സമയബന്ധിതമായി അനുമതി നല്കുന്നതില് വീഴ്ച വരുത്തുന്ന ഉദ്യോഗസ്ഥര്ക്കെതിരെ കര്ശനമായ നടപടി സ്വീകരിക്കുമെന്നും മുഖ്യമന്ത്രി പറഞ്ഞു. സ്വന്തമായി ഭൂമി ഉണ്ടായിട്ടും വീട് നിര്മ്മിക്കുവാന് അനുമതി ലഭിക്കുന്നതുമായി ബന്ധപ്പെട്ട് നിലനില്ക്കുന്ന കാലതാമസവും തടസ്സവാദങ്ങളും സാധാരണക്കാര് നേരിടുന്ന പ്രധാന പ്രശ്നമാണെന്ന് അറിയിച്ച മുഖ്യമന്ത്രി 2016ല് എല്.ഡി.എഫ് സര്ക്കാര് ആവിഷ്ക്കരിച്ച ലൈഫ് പദ്ധതി പ്രകാരം ഇതിനകം 4,27,000 പേര്ക്ക് വീട് വച്ച് നല്കിയെന്നും പറഞ്ഞു.
നെല്വയല് തണ്ണീര്ത്തട നിയമം നിലവില് വന്ന 2008 ല് ഉടമസ്ഥാവകാശം ഉണ്ടായിരുന്നതും ഡേറ്റാ ബാങ്കില് ഉള്പ്പെട്ടതുമായ നെല്വയലിന്റെ ഉടമസ്ഥനോ അയാളുടെ കുടുംബത്തിനോ വീട് വയ്ക്കാന് പറ്റിയ സ്ഥലം സ്വന്തം ജില്ലയില് ഇല്ലാത്തപക്ഷം ഗ്രാമപഞ്ചായത്തില് 10 സെന്റും, നഗരപ്രദേശങ്ങളില് 5 സെന്റും നിലം വീട് വയ്ക്കാനും അനുമതി ലഭിക്കും.
എല്ലാ തദ്ദേശസ്വയംഭരണ സ്ഥാപനങ്ങളിലെയും ഉദ്യോഗസ്ഥര് ഇക്കാര്യത്തില് അനുമതി നല്കാന് പ്രത്യേകം ശ്രദ്ധിക്കണം. ഓരോ കാരണവും പറഞ്ഞ് മടക്കലാണ് തങ്ങളുടെ ഉത്തരവാദിത്വമെന്ന് കരുതാന് പാടില്ല. അര്ഹതപ്പെട്ടവര്ക്ക് സമയബന്ധിതമായി അനുമതി നല്കുന്നതില് വീഴ്ച വരുത്തുന്ന ഉദ്യോഗസ്ഥര്ക്കെതിരെ കര്ശനമായ നടപടി സ്വീകരിക്കുമെന്നും മുഖ്യമന്ത്രി പറഞ്ഞു.
