കുറ്റ്യാടി: പാരോക്സി സ്മൽ നോക്റ്റേണൽ ഹീമോഗ്ലോബിനൂറിയ (പി.എൽ.എച്ച്) എന്ന അപൂർവ്വ രോഗത്തിന് കീഴ്പ്പെട്ട കുറ്റ്യാടി സ്വദേശി അർജുനെ ജീവിതത്തിലേക്ക് തിരിച്ചുകൊണ്ടുവരാൻ സന്നദ്ധ സാമൂഹ്യ ഇടപെടലുകൾ സജീവമാക്കി സന്നദ്ധ സംഘടനകൾ. ബ്ലഡ് ട്രാൻസ്പ്ലാറാണ് അർജുന് നിർദ്ദേശിച്ചിരിക്കുന്ന ചികിത്സ എന്നതിനാലും ആദ്യഘട്ടം പരാജയപ്പെട്ടതിനാലും എത്രയും പെട്ടന്ന് മറ്റൊരു സാമ്യമുള്ള ദാതാവിനെ കണ്ടെത്തിയാൽ മാത്രമേ മുന്നോട്ട് പോകാൻ കഴിയൂ എന്ന സാഹചര്യത്തിലാണ് രാജ്യത്തെ സന്നദ്ധ രക്തമൂല കോശദാതാക്കളുടെ സംഘടനയായ ദാത്രി ബ്ലഡ് സ്റ്റം സെൽഡോണർ രജിസ്ട്രിയും സംയുക്തമായി ഡോണർ രജിസ്ട്രേഷൻ ക്യാമ്പിനായി തുടക്കം കുറിച്ചിരിക്കുന്നത്.
ഫിബ്രവരി രണ്ടിന് ഞായറാഴ്ച കുറ്റ്യാടി എം.ഐ.യു.പി സ്കൂളിൽ വെച്ച് നടക്കുന്ന രക്തമൂല കോശദാന രജിസ്ട്രേഷൻ ക്യാമ്പ് വിജയിപ്പിക്കുന്നതിനായി ഒയിസ്ക കുറ്റ്യാടി ചാപ്റ്ററിൻ്റെ നേതൃത്വത്തിൽ ക്യാമ്പസ് ക്യാമ്പയിന് തുടക്കമായി. കുറ്റ്യാടി സഹകരണ കോളേജ്, എം.ച്ച് ആർട്സ് ആൻ്റ് സയൻസ് കോളേജ് അടുക്കത്ത് തുടങ്ങിയിടങ്ങളിൽ ഒയിസ്ക പ്രവർത്തകർ വിദ്യാർത്ഥികളുമായി സംവദിച്ച് ക്യാമ്പിൻ്റെ പ്രാധാന്യം ചർച്ച ചെയ്തു. ക്യാമ്പയിൻ്റെ ഉദ്ഘാടനം അടുക്കത്ത് എം.എച്ച് ആർട്സ് സയൻസ് കോളേജിൽ ഒയിസ്ക പ്രസിഡൻ്റ് ഡോ: സച്ചിത്ത് നിർവ്വഹിച്ചു. കോളേജ് പ്രിൻസിപ്പാൾ ഇ.കെ.ജാബിർ മൊയ്തു അദ്ധ്യക്ഷനായി. ഒയിസ്ക സെക്രട്ടറി ജമാൽ പാറക്കൽ, ഇ സെഡ്.എ സൽമാൻ, കെ.പി.സുരേഷ്, പി.പി.ദിനേശൻ, കെ.പി.ആർ.അഫീഫ് തുടങ്ങിയവർ പങ്കെടുത്തു.
