സ്ലീപ്പര്‍ കോച്ചുകളില്‍ കുറഞ്ഞ നിരക്കില്‍ യാത്ര ചെയ്യാവുന്ന തരത്തില്‍ വരുത്തിയ ഡി റിസര്‍വേഷന്‍ കോച്ചുകൾ ദക്ഷിണ റെയില്‍വേ വെട്ടിക്കുറച്ചു. തിരുവനന്തപുരം- മംഗലാപുരം എക്‌സ്പ്രസ്സ് (16347), കണ്ണൂര്‍- യശ്വന്ത്പൂര്‍ എക്‌സ്പ്രസ്സ് (16528), ചെന്നൈ എഗ്മോര്‍- മംഗലാപുരം എക്‌സ്പ്രസ്സ് (16159) എന്നീ ട്രെയിനുകളിലെ ഡി റിസര്‍വ്ഡ് സ്ലീപ്പര്‍ കോച്ചുകളാണ് വെട്ടിക്കുറച്ചത്. അതേസമയം, ആലപ്പുഴ- ധന്‍ബാദ് എക്‌സ്പ്രസ്സില്‍ (13352) ഡി റിസര്‍വേഷന്‍ ഏര്‍പ്പെടുത്തുകയും ചെയ്തു.
തിരുവനന്തപുരം- മംഗലാപുരം എക്‌സ്പ്രസ്സില്‍ നിലവിലെ രണ്ട് സ്ലീപ്പര്‍ കോച്ചുകളിലെ ഡി റിസര്‍വേഷന്‍ ഒരു കോച്ചാക്കിയാണ് കുറച്ചത്. എസ് 8 കോച്ചിലാണ് ഈ സൗകര്യം. കോഴിക്കോട് മുതല്‍ മംഗലാപുരം വരെയാണ് സൗകര്യമുണ്ടാകുക. കണ്ണൂര്‍- യശ്വന്ത്പൂര്‍ എക്‌സ്പ്രസ്സില്‍ മൂന്ന് സ്ലീപ്പര്‍ കോച്ചുകളിലുണ്ടായിരുന്ന ഡി റിസര്‍വേഷന്‍ രണ്ടാക്കി കുറച്ചു. എസ് 7, എസ് 8 കോച്ചുകളില്‍ ഈ സൗകര്യമുണ്ടാകും. കണ്ണൂര്‍ മുതല്‍ കോഴിക്കോട് വരെയാണ് ഈ സൗകര്യം. ഈ രണ്ട് ട്രെയിനുകളിലെയും പരിഷ്‌കാരം മാര്‍ച്ച് 23 മുതല്‍ നിലവില്‍ വരും. ആലപ്പുഴ- ധന്‍ബാദ് എക്‌സ്പ്രസ്സില്‍ രണ്ട് സ്ലീപ്പര്‍ കോച്ചുകളിലാണ് (എസ് 5, എസ് 6) ഡി റിസര്‍വേഷന്‍ സൗകര്യമുണ്ടാകുക. മാര്‍ച്ച് 24ന് ഇത് നിലവില്‍ വരും. ആലപ്പുഴ മുതല്‍ കോയമ്പത്തൂര്‍ ജങ്ഷന്‍ വരെയാണ് സൗകര്യമുണ്ടാകുക.
ചെന്നൈ എഗ്മോര്‍- മംഗലാപുരം എക്‌സ്പ്രസ്സില്‍ ഒരു സ്ലീപ്പര്‍ കോച്ചിലെ ഡി റിസര്‍വേഷന്‍ സൗകര്യം രണ്ടെണ്ണമാക്കി വര്‍ധിപ്പിച്ചു. എസ് 10, എസ് 11 കോച്ചുകളിലാണ് ഈ സൗകര്യമുണ്ടാകുക. അതേസമയം, തിരുച്ചിറപ്പള്ളി മുതലുള്ള സൗകര്യം കോയമ്പത്തൂര്‍ ജങ്ഷന്‍ മുതലാണ് മംഗലാപുരം വരെയുണ്ടാകുക. മാര്‍ച്ച് 25 മുതല്‍ മാറ്റം പ്രാബല്യത്തില്‍ വരും. ചെന്നൈ എഗ്മോര്‍- ചെങ്കോട്ട- എഗ്മോര്‍ എക്‌സ്പ്രസ്സിലെ (20681/82) ഡി റിസര്‍വേഷന്‍ പൂര്‍ണമായി ഒഴിവാക്കി. മാര്‍ച്ച് 23 മുതല്‍ നിലവില്‍ വരും.
