ആയുഷ്മാൻ ഭാരത് ആരോഗ്യ ഇൻഷുറൻസ് പദ്ധതി നടപ്പാക്കണം

കൊയിലാണ്ടി: 70 വയസ്സ് കഴിഞ്ഞ മുതിർന്ന പൗരന്മാർക്ക് അവകാശപ്പെട്ട ആയുഷ്മാൻ ഭാരത് ആരോഗ്യ ഇൻഷുറൻസ് പദ്ധതി കേരളത്തിലും നടപ്പാക്കണമെന്ന് കേരള സീനിയർ സിറ്റിസൺസ് ഫോറം ജില്ലാ സമ്മേളനം ആവശ്യപ്പെട്ടു. നിഷേധിക്കപ്പെട്ട റെയിൽവേ ആനുകൂല്യം പുനഃസ്ഥാപിക്കുക,
വയോധികർക്കുള്ള ക്ഷേമ പെൻഷൻ 5000 രൂപയായി വർദ്ധിപ്പിക്കുക.
ക്ഷേമ പെൻഷൻ കുടിശ്ശികയില്ലാതെ ലഭ്യമാക്കുക തുടങ്ങിയ ആവശ്യങ്ങളും സമ്മേളനം ഉന്നയിച്ചു. കൊയിലാണ്ടി നഗരസഭാ ഉപാധ്യക്ഷൻ അഡ്വ.കെ സത്യൻ ഉദ്ഘാടനം ചെയ്തു. ജില്ലയിലെ 160 യൂണിറ്റ് കളിൽ നിന്നും എഴുന്നൂറോളം അംഗങ്ങൾ സമ്മേളനത്തിൽ പങ്കെടുത്തു . ജില്ലാ പ്രസിഡന്റ് ഇ.കെ. അബൂബക്കർ അധ്യക്ഷനായി. സംസ്ഥാന ജനറൽ സെക്രട്ടറി പി. കുമാരൻ, സംസ്ഥാന സെക്രട്ടറിമാരായ ചാത്തു, കെ.രാധാകൃഷ്ണൻ, വൈസ് പ്രസിഡന്റ് കെ. വി. ബാലൻ കുറുപ്പ്,ജില്ലാ സെക്രട്ടറി സോമൻ ചാലിൽ , വൈസ് പ്രസിഡന്റ് ഇ.സി. ബാലൻ എന്നിവർ സംസാരിച്ചു.
പൂതേരി ദാമോദരൻ നായർ, മുൻ ജില്ലാ ജോയിന്റ് സെക്രട്ടറി ഉണ്ണീരിക്കുട്ടി കുറുപ്പ്, എൻ.കെ.കുഞ്ഞിച്ചെക്കിണി എന്നിവരെ മുതിർന്ന നേതാവ് എം.കെ. സത്യപാലൻ ആദരിച്ചു. വയോജനങ്ങൾ അവതരിപ്പിച്ച കലാപരിപാടികളും അരങ്ങേറി.