കൊയിലാണ്ടി: പിഷാരികാവ് ക്ഷേത്രത്തിലും ചുറ്റിലുമുള്ള മാലിന്യം സംസ്കരിക്കുന്ന 20 KLD ശേഷിയുള്ള സീവേജ് ട്രീറ്റ്മെന്റ് പ്ലാന്റിന്റെ നിർമ്മാണം തുടങ്ങി. ക്ഷേത്രത്തിലെ കംഫർട്ട് സ്റ്റേഷൻ, ഊട്ടുപുര, നാലമ്പലം എന്നിവിടങ്ങളിലെ ദ്രവ മാലിന്യങ്ങളും ജൈവ മാലിന്യങ്ങളും സംസ്കരിക്കാൻ സാധിക്കുന്ന മാലിന്യ സംസ്കരണ പ്ലാന്റും, ബയോഗ്യാസ് പ്ലാന്റുമാണ് ഇതിന്റെ ഭാഗമായി നിർമ്മിക്കുന്നത്. പിഷാരികാവ് ക്ഷേത്രത്തിന്റെ ചുറ്റിലും കാലങ്ങളായി അനുഭവിച്ചുകൊണ്ടിരിക്കുന്ന മാലിന്യ പ്രശ്നത്തിന് ഇതോടെ പരിഹാരമാകും. ഏതാണ്ട് രണ്ട് കോടിയോളം രൂപ ചിലവിട്ടുകൊണ്ട് തുടങ്ങുന്ന പ്ലാന്റിന്റെ നിർമ്മാണം കേരള സർക്കാറിന്റെ അക്രഡിറ്റഡ് ഏജൻസിയായ ഇന്റഗ്രേറ്റഡ് റൂറൽ ടെക്നോളജി സെന്ററാണ് ഏറ്റെടുത്തിട്ടുള്ളത്.
ക്ഷേത്ര പരിസരത്ത് വെച്ച് നടന്ന ചടങ്ങിൽ പ്ലാന്റിന്റെ ശിലാസ്ഥാപനം കാനത്തിൽ ജമീല എം.എൽ.എ നിർവ്വഹിച്ചു. പിഷാരികാവ് ദേവസ്വം ചെയർമാൻ ഇളയിടത്ത് വേണുഗോപാൽ അധ്യക്ഷം വഹിച്ചു. ചടങ്ങിൽ മലബാർ ദേവസ്വം കമ്മീഷണർ ടി.സി. ബിജു മുഖ്യാഥിതിയായി. ട്രസ്റ്റി ബോർഡ് അംഗങ്ങളായ കീഴയിൽ ബാലൻ നായർ, വാഴയിൽ ബാലൻ നായർ, എരോത്ത് അപ്പുക്കുട്ടി നായർ, സി. ഉണ്ണികൃഷ്ണൻ മാസ്റ്റർ, ടി. ശ്രീപുത്രൻ, എം. ബാലകൃഷ്ണൻ, പി.പി. രാധാകൃഷ്ണൻ, മലബാർ ദേവസ്വം അസ്സി. കമ്മീഷണർ കെ.കെ. പ്രമോദ് കുമാർ, ദേവസ്വം മാനേജർ വി.പി ഭാസ്കരൻ, പ്രൊജക്ട് എഞ്ചിനീയർ എം. നാസർ, കെ.കെ. രാകേഷ്, പി.സി. അനിൽ കുമാർ എന്നിവർ പ്രസംഗിച്ചു.
