ലഡു ഉണ്ടോ ലഡു…ഗൂഗിൾ പേ യൂസർമാരെല്ലാം ഇപ്പോൾ ലഡു തപ്പി നടക്കുന്നു. നിരവധിയാളുകളാണ് വാട്സാപ്പിലും ഇൻസ്റ്റഗ്രാം ചാറ്റിലും ലഡു ചോദിച്ചു നടക്കുന്നത്. കളർ ലഡു, ഫുഡ്ഡി ലഡു, ഡിസ്കോ ലഡു, ദോസ്തി ലഡു, ട്വിങ്കിൾ ലഡു, പിന്നെ ട്രെൻഡി ലഡുവും. ആറെണ്ണവും കിട്ടിയാൽ സമ്മാനം. 51 രൂപ മുതൽ 1001 രൂപ വരെ സമ്മാനം എന്നാണ് ഗൂഗിൾ പേ പറയുന്നത്.
ആദ്യത്തെ രണ്ട് ലഡുകൾ ഇഷ്ടം പോലെ കിട്ടാനുണ്ട്. ബാക്കി ഉള്ളവ കിട്ടുക ശ്രമകരം തന്നെ. ട്വിങ്കിൾ ലഡു ആണ് കിട്ടാൻ ഏറ്റവും ബുദ്ധിമുട്ടെന്ന് ലഡു അന്വേഷകര്‍ പറയുന്നു. എക്‌സ് എന്ന പഴയ ട്വിറ്ററിൽ സംഗതി ട്രെൻഡിങാണ്. ഇൻസ്റ്റ കമന്റ് ബോക്സുകളിലും ഫേസ്‌ബുക്കിലും ട്വിങ്കിൾ ലഡു ഉണ്ടോ..ഉണ്ടോ.. എന്ന് ചോദിച്ച് ആളുകൾ തിരക്ക് കൂട്ടുന്നതായി കാണാം.
ഈ ബഹളത്തിന്റെ ഇടയിൽ ട്വിങ്കിൾ ലഡു മാത്രം കിട്ടിയ ഒരു ന്യൂനപക്ഷവുമുണ്ട്. 51 മുതൽ 1001 വരെ സമ്മാനത്തുക എന്ന് ഗൂഗിൾ പേ പറയുമ്പോഴും ഒരു രൂപ മാത്രം കിട്ടി എന്ന് പറയുന്നവരും ഏറെയാണ്. സംഗതി ഗൂഗിൾ പേയിൽ ആളെ കയറ്റാനുള്ള തന്ത്രമാണ്. ഇതുപോലുള്ള മത്സരങ്ങൾ ഗൂഗിൾ പേ ഇതിന് മുമ്പും കുറെ നടത്തിയിട്ടുണ്ട്. പറഞ്ഞുവരുമ്പോൾ തമാശ ആണെങ്കിലും നിലവിലെ സാമ്പത്തിക സ്ഥിതിയിൽ ഈ പൈസ എങ്കിലും കിട്ടിയിരുന്നെങ്കിൽ എന്ന് ആഗ്രഹിക്കുന്നവർ സമൂഹത്തിൽ ഉണ്ട്.
