രോഷത്തിന്റെ രക്തത്തുള്ളികൾ വരച്ച് അഭിലാഷ് തിരുവോത്ത്. കഴിഞ്ഞദിവസം ആത്മഹത്യചെയ്ത കണ്ണൂർ എ.ഡി.എം. നവീൻ ബാബുവിന്റെ സംസ്ക്കാര സമയത്ത് മകൾ ഉദകക്രിയ ചെയ്യുന്ന രംഗത്തെ അനുസ്മരിച്ച് വരച്ച ചിത്രം നവമാധ്യമങ്ങളിൽ വൈറലായി. ആയിരക്കണക്കിനാളുകളാണീ ചിത്രം കണ്ടത്. പലരും സ്റ്റാറ്റസ് ആക്കി. കോൺഗ്രസ് നേതാവ് വി.ടി. ബൽറാം ഉൾപ്പെടെ ഒട്ടേറെ പ്രമുഖർ ചിത്രം പങ്കുവെച്ചു.
തോളിലെ പാതിയുടഞ്ഞ മൺ കുടത്തിൽനിന്ന് പിന്നിലേക്കിറ്റിവീഴുന്ന രക്തത്തുള്ളികൾ വേദനയുടെയും നിസ്സഹായതയുടെയും രോഷത്തിന്റെയും പ്രതീകമായി പൊതുസമൂ ഹം വായിച്ചെടുക്കുന്നുണ്ട്. ആത്മ നൊമ്പരം ഉള്ളിൽപ്പേറി ചിതയെ ചുറ്റുന്ന മകളുടെ ഹൃദയവേവിനെ പലരും ഫെയ്സ്ബുക്കടക്കമുള്ള ഓൺലൈൻ പ്ലാറ്റ്ഫോമിൽ പകർത്തി ആത്മരോഷം വെളിപ്പെടുത്തി. അധ്യാപകനും ചിത്രകാരനുമായ അഭിലാഷ് തിരുവോത്ത് കേരളത്തിനകത്തും പുറത്തുമായി ഒട്ടേറെ ചിത്ര പ്രദർശനങ്ങൾ നടത്തി ശ്രദ്ധേയനായ ആർട്ടിസ്റ്റാണ്.
