വാണിമേൽ പഞ്ചായത്ത് 9, 10, 11 വാർഡുകളിലും നരിപ്പറ്റ പഞ്ചായത്ത് മൂന്നാം വാർഡിലും സംസ്ഥാന ഗവൺമെൻ്റ് പ്രഖ്യാപിച്ച സൗജന്യ റേഷൻ പാഴ് വാക്കായി മാറിയിരിക്കുകയാണെന്ന് യൂത്ത് കോൺഗ്രസ് നാദാപുരം നിയോജക മണ്ഡലം പ്രസിഡന്റ്‌ അനസ് നങ്ങാണ്ടി പറഞ്ഞു. നിലവിൽ വിലങ്ങാട് ഉരുൾ പൊട്ടൽ നേരിട്ട് ബാധിച്ച 11 ആം വാർഡിലെ കമ്പളിപാറ, ഉരുട്ടി, മലയങ്ങാട്, വളാൻതോട് ഉൾപ്പടെയുള്ള സ്ഥലങ്ങളിലെ ആളുകൾക്ക് ഈ ആനുകൂല്യം ലഭിച്ചിട്ടില്ലെന്ന പരാതിയുടെ അടിസ്ഥാനത്തിലാണ് അദ്ദേഹം ഈ പ്രസ്താവന നടത്തിയിട്ടുള്ളത്. നിലവിൽ ആനുകൂല്യം പ്രഖ്യാപിച്ച പല സ്ഥലങ്ങളിലും ഈ ആനുകൂല്യം ലഭിക്കുന്നില്ലെന്നും ഇത് ദുരിതബാധിതരോട് ചെയ്യുന്ന കടുത്ത വഞ്ചനയാണെന്നും അദ്ദേഹം പറഞ്ഞു.
നിലവിലെ സാഹചര്യത്തിൽ ഉരുൾപൊട്ടൽ ബാധിതരെ ചേർത്തു പിടിക്കുന്നതിൽ സംസ്ഥാന ഗവൺമെൻ്റ് പൂർണ്ണ പരാജയമാണെന്നും അടിയന്തിരമായി ദുരിത ബാധിതർക്ക് സഹായമെത്തിക്കുന്നതിൽ ഗവൺമെൻ്റ്ഇടപെടണമെന്നും അദ്ദേഹം പറഞ്ഞു.
