സെറിബ്രല്‍ പാള്‍സിയെ അതിജീവിച്ച് ഇന്ത്യന്‍ സിവില്‍ സര്‍വീസിലെത്തിയ കീഴരിയൂര്‍ സ്വദേശിനി എ.കെ.ശാരിക റെയില്‍വേ മാനേജ്‌മെന്റ് സര്‍വീസിലേക്ക്. ഇതുസംബന്ധിച്ച നിയമന ഉത്തരവ് കേന്ദ്രസര്‍ക്കാരിന്റെ പേഴ്‌സണല്‍ മന്ത്രാലയത്തില്‍നിന്ന് ശാരികയ്ക്കു ഒരാഴ്ച മുമ്പ് ലഭിച്ചു. ലഖ്‌നൗവില്‍ രണ്ട് വര്‍ഷത്തെ പരിശീലനം ഇതിന്റെ ഭാഗമായി ഉണ്ടാവും. വരുന്ന ഡിസംബര്‍ മാസം മുതലായിരിക്കും പരിശീലനം. പരിശീലനത്തിന് പോകാനുളള തയ്യാറെടുപ്പുകള്‍ തുടങ്ങിയതായി ശാരിക പറഞ്ഞു.
ഐ.എ.എസിന്റെ ആദ്യ റാങ്കില്‍ ഇടം പിടിക്കണമെന്നത് ഇപ്പോഴും വലിയ മോഹമാണെന്ന് ശാരിക പറഞ്ഞു. ഇതിനായുളള ശ്രമം തുടരും. ഒന്‍പത് പ്രാവശ്യം ഐ.എ.എസ് പരീക്ഷ എഴുതാവുന്നതാണ്. ഇനിയും അവസരങ്ങള്‍ ഉണ്ട്.
ജന്മനാ സെറിബ്രല്‍ പാള്‍സി രോഗ ബാധിതയായ ശാരിക, വീല്‍ച്ചെയറില്‍ ഇരുന്നാണ് ഇന്ത്യന്‍ സിവില്‍ സര്‍വ്വീസ് എന്ന സ്വപ്നനേട്ടം സ്വന്തമാക്കിയത്. ഇടതു കൈയിലെ മൂന്നുവിരലുകള്‍ മാത്രമേ ശാരികയ്ക്കു ചലിപ്പിക്കാനാകൂ. ഭിന്നശേഷിക്കാരായ വിദ്യാര്‍ഥികള്‍ക്ക് സൗജന്യ സിവില്‍ സര്‍വീസ് പരിശീലനം നല്‍കാന്‍ അബ്‌സല്യൂട്ട് ഐ.എ.എസ്. അക്കാദമിയുടെ സ്ഥാപകനായ ഡോ. ജോബിന്‍ എസ്.കൊട്ടാരം ആരംഭിച്ച ‘പ്രൊജക്റ്റ് ചിത്രശലഭം’ എന്ന പരിശീലന പദ്ധതിയാണ് ശാരികയുടെ ജീവിതത്തില്‍ വഴിത്തിരിവായത്. സിവില്‍ സര്‍വീസ് പരീക്ഷയില്‍ 922-ാം റാങ്ക് നേടിയാണ് ശാരിക സിവില്‍ സര്‍വീസ് എന്ന ലക്ഷ്യം സ്വന്തമാക്കിയത്. കീഴരിയൂര്‍ എരേമ്മന്‍ കണ്ടി ശശിയുടെയും രാഖിയുടെയും മകളാണ്. പ്ലസ്ടു വിദ്യാര്‍ഥിനിയായ ദേവിക സഹോദരിയാണ്.
