കൊയിലാണ്ടി: സി.പി.എം കോഴിക്കോട് ജില്ലാ സെക്രട്ടറി പി.മോഹനനും,ജില്ലാ സെക്രട്ടറിയേറ്റ് അംഗവും കെ.എസ്.കെ.ടി.യു ജില്ലാ സെക്രട്ടറിയുമായ കെ.കെ.ദിനേശനും സഞ്ചരിച്ച കാറിന് പിന്നില്‍ കോഴിക്കോട്-കണ്ണൂര്‍ റൂട്ടിലോടുന്ന സ്വകാര്യ ബസ്സിടിച്ചു അപകടം. തിങ്കളാഴ്ച വൈകീട്ട് മൂന്നേമുക്കാലോടെയാണ് അപകടമുണ്ടായത്. കോഴിക്കോട് നിന്ന് കൊയിലാണ്ടി ഭാഗത്തേക്ക് വരികയായിരുന്നു പി.മോഹനനും ദിനേശനും. ചേമഞ്ചേരി വെറ്റിലപ്പാറയില്‍ പുതുതായി നിര്‍മ്മിച്ച സര്‍വ്വീസ് റോഡിലൂടെ വരുമ്പോള്‍ കാറിന് പിന്നില്‍ ബസ്സിടിക്കുകയായിരുന്നു. സുനില്‍ എന്നയാളാണ് കാര്‍ ഓടിച്ചത്. അപകടത്തില്‍ ഇവര്‍ക്കാര്‍ക്കും പരിക്കില്ല.കോഴിക്കോട് നിന്ന് കണ്ണൂരിലേക്ക് പോകുകയായിരുന്ന കിങ് കൊഗര്‍ എന്ന ബസ്സാണ് കാറില്‍ ഇടിച്ചത്. സര്‍വ്വീസ് റോഡില്‍ ബസ്സ് മറികടക്കാന്‍ ശ്രമിച്ചപ്പോഴാണ് അപകടമുണ്ടായത്. കാറിന്റെ പിന്‍ ഭാഗത്ത് കേടുപാടുകള്‍ സംഭവിച്ചിട്ടുണ്ട്. അപകടത്തെ തുടര്‍ന്ന് സ്ഥലത്ത് നേരിയ തോതില്‍ ഗതാഗത തടസ്സമുണ്ടായി. കൊയിലാണ്ടി പോലീസ് സ്ഥലത്തെത്തി.
വേണ്ടത്ര വീതിയില്ലാത്ത സര്‍വ്വീസ് റോഡില്‍ പോലും ബസ്സുകള്‍ മറ്റ് വാഹനങ്ങളെ മറികടന്ന് ഓടുന്നത് പതിവ് കാഴ്ചയാണ്. പല സ്ഥലത്തും റോഡ് തകര്‍ന്ന് കിടപ്പാണ്. ഇതിനിടയിലൂടെയാണ് മല്‍സര ഓട്ടം.
