ആറന്മുള അഷ്ടമിരോഹിണി വള്ളസദ്യയ്ക്കെത്തിയ കുറിയന്നൂർ പള്ളിയോടത്തിൽനിന്ന് പമ്പാനദിയിൽ വീണ് അമരക്കാരനായ അധ്യാപകൻ മുങ്ങിമരിച്ചു. കുറിയന്നൂർ മാർത്തോമ്മാ ഹൈസ്കൂൾ അധ്യാപകനായ കുറിയന്നൂർ തോട്ടത്തുമഠത്തിൽ തോമസ് ജോസഫ് (സണ്ണി-55) ആണ് മരിച്ചത്. കുറിയന്നൂർ പള്ളിയോടത്തിന്റെ അമരത്തിലെ രണ്ടാം അടനയമ്പുകാരനായിരുന്നു സണ്ണി .സത്രക്കടവിനു സമീപത്തു നിന്ന് തിരിഞ്ഞു ആറൻമുള ക്ഷേത്രക്കടവിലേക്കു എത്തുമ്പോഴാണു പള്ളിയോടത്തിൽനിന്നു വീണത്. മറ്റൊരാൾ നദിയിലേക്കു ചാടി രക്ഷിക്കാൻ ശ്രമിച്ചെങ്കിലും സാധിച്ചില്ല.
റസ്ക്യൂ ബോട്ട് അംഗങ്ങളും അഗ്നിരക്ഷാസേനയുടെ സ്കൂബ : ടീമും തിരഞ്ഞെങ്കിലും കണ്ടെത്താനായില്ല. ഒടുവിൽ പ്രദേശവാസികളാണ് മൃതദേഹം കണ്ടെത്തിയത്.
ഭാര്യ: ഇരവിപേരൂർ ശങ്കരമംഗലത്ത് മംഗലശേരിൽ ആശ ജേക്കബ് (തിരുവല്ല ഈസ്റ്റ് കോ-ഓപ്പറേറ്റീവ് ബാങ്ക് ഡപ്യൂട്ടി ജനറൽ മാനേജർ). മക്കൾ: അശ്വിൻ ജോസഫ് തോമസ്, അലീഷ മെറിൻ തോമസ്. ടി.എ.ജോസ ഫിൻ്റെയും പരേതയായ മേരിക്കുട്ടി ജോസഫിൻ്റെ യും മകനായ തോമസ് 40 വർഷത്തിലേറെയായി കുറിയന്നൂർ പള്ളിയോടത്തിന്റെ ഭാഗമായിരുന്നു.തിരുവല്ല ടൈറ്റസ് സെക്കൻഡ് ബി.എഡ് കോളേജിലെ പൂർവ്വ വിദ്യാർത്ഥിയാണ് .
