വയനാട് ഉരുള്പൊട്ടല് ദുരന്തത്തില് മരണപ്പെട്ടവരുടെ കുടുംബത്തിന് സംസ്ഥാന സർക്കാർ 6 ലക്ഷം രൂപ ധനസഹായം പ്രഖ്യാപിച്ചു. മരിച്ചവരുടെ കുടുംബാംഗങ്ങളില്ലെങ്കിൽ അടുത്ത ബന്ധുക്കൾക്ക് ധനസഹായം ലഭിക്കും. ഇതിനായി പിന്തുടർച്ച അവകാശ സർട്ടിഫിക്കറ്റ് ഹാജരാക്കേണ്ടതുണ്ട്.
കാണാതായ വ്യക്തികളുടെ ആശ്രിതർക്കും ധനസഹായം നൽകുന്നതാണ്. 70 % അംഗവൈകല്യം ബാധിച്ചവർക്ക് 75000 രൂപ നൽകുമെന്നും, അതിൽ കുറവുള്ളവർക്ക് 50000 രൂപ ധനസഹായം നല്കുമെന്നും മുഖ്യമന്ത്രി പിണറായി വിജയൻ അറിയിച്ചു.
അതോടൊപ്പം, ദുരന്തബാധിത കുടുംബത്തിന് പ്രതിമാസം വാടകയിനത്തിൽ 6000 രൂപ നൽകുമെന്നും മുഖ്യമന്ത്രി വ്യക്തമാക്കി. വാടകത്തുക ബന്ധുവീടുകളിലേക്ക് താമസം മാറുന്നവർക്കും നൽകുന്നതാണ്. എന്നാൽ, സ്പോൺസർഷിപ്പ് കെട്ടിടങ്ങളിലേക്കോ, സർക്കാർ സംവിധാനങ്ങളിലേക്കോ താമസം മാറുന്നവർക്ക് വാടക തുക ലഭിക്കില്ല.
ദുരന്തത്തിൽ രേഖകൾ നഷ്ടമായവർക്ക് ഇവ പുതുക്കി വാങ്ങാമെന്ന് പറഞ്ഞ മുഖ്യമന്ത്രി, ഇതിന് ഫീസുണ്ടാകില്ലെന്നും കൂട്ടിച്ചേർത്തു. കൂടാതെ, പോലീസ് നടപടി പൂർത്തിയാക്കുകയും, കാണാതായവരുടെ പട്ടിക തയ്യാറാക്കുകയും ചെയ്യുമെന്നും മുഖ്യമന്ത്രി വാർത്താസമ്മേളനത്തിൽ അറിയിച്ചു.
