ജൂലൈ ഒന്നുമുതൽ കേരളത്തിലെ 39 എക്സ്പ്രസ് ട്രെയിനുകൾ പാസഞ്ചറാകും. കോവിഡ് ലോക്ഡൗണിന് ശേഷം ട്രെയിൻ ഗതാഗതം പുനസ്ഥാപിച്ചപ്പോൾ അൺ റിസർവ്ഡ് എക്സ്പ്രസ് സ്പെഷൽ എന്ന പേരിലേക്ക് മാറ്റിയ പാസഞ്ചർ ട്രെയിനുകളാണ് തിരികെയെത്തുന്നത്. കേരളത്തിൽ സർവീസ് നടത്തുന്ന 39 ട്രെയിനുകൾ ഉൾപ്പെടെ ദക്ഷിണ റെയിൽവേയുടെ പരിധിയിലുള്ള 140 എക്സ്പ്രസ് ട്രെയിനുകളാണ് ജൂലൈ ഒന്നു മുതൽ വീണ്ടും പാസഞ്ചർ ട്രെയിനുകളാകുന്നത്.
ഇത് സംബന്ധിച്ച് റെയിൽവേ മന്ത്രാലയം വിജ്ഞാപനം പുറപ്പെടുവിച്ചു കഴിഞ്ഞു. ഇതോടെ ദക്ഷിണ റെയിൽവേയിൽ കൂടുതൽ പാസഞ്ചർ ട്രെയിനുകളിൽ മിനിമം യാത്രാ നിരക്ക് 10 രൂപയായി കുറയും. നിലവിൽ 30 രൂപയാണ് ഈടാക്കുന്നത്.
പാസഞ്ചറുകളുടെ നമ്പരുകൾ പുനഃക്രമീകരിക്കുന്നതിൻ്റ ഭാഗമായി ദക്ഷിണ റെയിൽവേ പുറത്തിറക്കിയ വിജ്ഞാപനത്തിൽ യാത്രാനിരക്ക് ഏകീകരിക്കുന്നത് സംബന്ധിച്ച് സൂചനകൾ ഒന്നുമില്ലെങ്കിലും നിരക്കുകൾ പഴയപടിയിലേക്ക് കുറയ്ക്കും എന്നാണ് കൊമേഴ്സ്യൽ വിഭാഗത്തിലെ ഉന്നത ഉദ്യോഗസ്ഥർ നൽകുന്ന വിവരം.
