കേരളത്തിലെ നാടകാസ്വാദകർ ഏറെ ചർച്ച ചെയ്ത “പാപ്പിസോറ” എന്ന ആദ്യ നാടകത്തിലൂടെ തന്നെ ശ്രദ്ധിക്കപ്പെട്ട കലാകാരിയാണ് മാളു.ആർ.ദാസ്.
മതയാഥാസ്ഥിതികതയേയും പൗരോഹിത്യത്തേയും നിശിത വിമർശനത്തിന് വിധേയമാക്കുന്ന “കക്കുകളി “എന്ന നാടകത്തിൽ അതു നേരിട്ട ഭീഷണികളെയും വിലക്കുകളേയും അതിജീവിച്ച് ഭയലേശമെന്യേ മുഖ്യ കഥാപാത്രമായി അവർ നിറഞ്ഞാടി.
തൃശൂർ സ്കൂൾ ഓഫ് ഡ്രാമയിൽ നിന്നും നാടക പഠനം പൂർത്തിയാക്കിയ ആലപ്പുഴ സ്വദേശിയായ മാളു.ആർ.ദാസ്, തന്റെ നാടക ജീവിതത്തെ ഒരു രാഷ്ട്രീയ പ്രവർത്തനമായും പ്രൊഫഷനായും, സർവ്വോപരി ജീവിതം തന്നെയായുംരൂപപ്പെടുത്തിയിട്ടുണ്ട്. അതു കൊണ്ടാണ്, തന്റെ സഹനാടകപ്രവർത്തകനായ സനോജ് മാമോയുമായുള്ള വിവാഹത്തിന് നാടകഅരങ്ങ് തന്നെ തെരഞ്ഞെടുത്ത്,വ്യവസ്ഥാപിതമായ വിവാഹ സങ്കല്പങ്ങളെ വെല്ലുവിളിച്ചത്.
1960 കളുടെ അവസാനത്തോടു കൂടി മലയാള നാടകവേദി ഘടനാപരമായും രാഷ്ട്രീയമായും ഒട്ടനവധി പുതിയ സാധ്യതകളെ സ്വാംശീകരിക്കുന്നുണ്ട്‌. ജനകീയ സാംസ്കാരിക വേദി പോലുള്ള സാംസ്കാരിക പ്രസ്ഥാനങ്ങൾ ഉയർത്തിവിട്ട വിപ്ലവാത്മകമായ ഉണർവ്വ് ഭാഷയിലും സാഹിത്യത്തിലുമെന്നപോലെ നാടകത്തിലും പുതിയ ഭാവുകത്വത്തോടെ പ്രതിഫലിക്കുകയുണ്ടായി. “നാടു ഗദ്ദിക” പോലുള്ള നാടകങ്ങൾ സവിശേഷ ശ്രദ്ധ നേടുന്നത് ഇക്കാലത്താണ്. നാടക കലാസംവാദങ്ങളും നാടകസമൃദ്ധമായ തെരുവുകളും കൊണ്ട് സമ്പന്നമായ ആ ചരിത്രത്തിലാണ് മധു മാഷും മലയാള നാടക പ്രവർത്തനങ്ങളിൽ സജീവമായി സ്ഥാനമുറപ്പിക്കുന്നത്.
പടയണിയും, അമ്മയും, കറുത്ത വാർത്തയും, സുനന്ദയും, കലി ഗുലയും, ക്രൈമും തുടങ്ങി മലയാള നാടകവേദിയിൽ മധു മാഷ് രേഖപ്പെടുത്തിയചരിത്രംവളരെ വലുതാണ്.അനീതികളോടും ആസുരതകളോടും യുദ്ധപ്രഖ്യാപനത്തിന് പിന്നിലാളുണ്ടോ എന്നു തിരിഞ്ഞു നോക്കാതെ ഇറങ്ങിത്തിരിച്ച ആക്ടിവിസ്റ്റും,നാടകത്തെ ഒരു കലാരൂപം എന്ന നിലയിൽ അരങ്ങിന്റെ സാധ്യതകളിലൂടെ മനുഷ്യന്റെ വിമോചന സ്വപ്നങ്ങൾക്കുള്ള ആയുധമാക്കി മാറ്റാൻ ശ്രമിച്ച അസാമാന്യപ്രതിഭയുമായിരുന്ന മധു മാഷിനെ പോലൊരാളുടെ പേരിലുള്ള നാടക പുരസ്കാരം,നാടകരംഗത്ത് പൂർണ്ണമായും സമർപ്പണബോധത്തോടെ ഇടപെടുന്ന,ജീവിതം തന്നെയാണെണെനിക്ക്‌ നാടകം എന്ന് അഭിമാനത്തോടെ പറയുന്ന,ഏറ്റവും പുതിയ തലമുറയിലെ നാടകകാരിയായ മാളൂ.ആർ.ദാസിന് തന്നെയാകണം എന്ന് ഏറെ അഭിമാനപൂർവ്വം ഞങ്ങൾ കരുതുന്നു. 2024 ജൂലൈ 20 നു കോഴിക്കോട് ടൗൺ ഹാളിൽ വിവിധ പരിപാടികളോടെ നടക്കുന്ന ചടങ്ങിൽ 10000 രൂപയും,പ്രശസ്തിപത്രവും, ഫലകവും,അടങ്ങുന്ന പുരസ്കാരം മാളു.ആർ.ദാസിന് സമ്മാനിക്കും.
പ്രമുഖ കവിയും ഗ്രന്ഥകാരനുമായ പി.എൻ.ഗോപീകൃഷ്ണന്റെ നേതൃത്വത്തിലാണ്‌ കൾച്ചറൽ ഫോറം അവാർഡിനു മാളുവിനെ തെരഞ്ഞെടുത്തത്‌.
