കൊയിലാണ്ടി : കൊയിലാണ്ടി താലൂക്ക് ആശുപത്രിയിലെ ഒരു വിഭാഗം ജീവനക്കാരുടെ അനാസ്ഥയും, രോഗികളോടുള്ള അവഗണനക്കുമെതിരെ ഡി.വൈ.എഫ്.ഐ കൊയിലാണ്ടി ബ്ലോക്ക് കമ്മിറ്റി ആശുപത്രി സൂപ്രണ്ടിനെ പ്രതിഷേധം അറിയിച്ചു. ജനങ്ങൾക്കാകെ ഉപകാരപ്പെടുന്ന വിധം കേരളത്തിലെ സർക്കാരും, ആരോഗ്യവകുപ്പും നടപ്പിലാക്കാൻ നിർദ്ദേശിച്ച നയങ്ങളെയും ശുപാർശകളെയും തള്ളിക്കളത്ത് ഏതാനും ചില ഉദ്യോഗസ്ഥരുടെ വ്യക്തിതാല്പര്യങ്ങൾക്കനുസരിച്ച് ആശുപത്രിയുടെ പ്രവർത്തനം നിയന്ത്രിക്കുന്നതിനെതിരെയാണ് പ്രതിഷേധം.
ദിവസം 1500 നു 2000 ത്തിനും ഇടയിൽ രോഗികൾ ചികിത്സക്കെത്തുന്ന സ്ഥാപനത്തിൽ ഒരു ദിവസത്തിൽ മെഡിസിൻ വിഭാഗത്തിൽ 30 രോഗികളെ മാത്രമേ പരിശോധിക്കൂ എന്ന ഡോക്ടറുടെ ധിക്കാരപരമായ നിലപാട് തിരുത്തുക. കൃത്യ സമയത്ത് ഒ.പി പ്രവർത്തനം ആരംഭിക്കുക, ഡ്യൂട്ടിസമയത്ത് ഡോക്ടർമാർ സ്വകാര്യ ആവശ്യങ്ങൾക്ക് പുറത്ത് പോവുന്നത് തടയുക, ചെറിയ രോഗങ്ങൾക്ക് വരെ രോഗികളെ മറ്റ് ഹോസ്പിറ്റലിലേക്ക് റഫറർ ചെയ്യുന്നത് അവസാനിപ്പിക്കണം, സർക്കാർ ആംബുലൻസ് വെച്ച് കൊണ്ട് സ്വകാര്യ ആംബുലൻസുകളെ രോഗികൾക്കായി ഏർപ്പാടാക്കുന്നത് നിർത്തുക, രോഗികളെ വലയ്ക്കുന്ന ലാബ് പരിഷ്കാരം തിരുത്തുക, ഫ്രീസർ,മോർച്ചറി സംവിധാനം പുനസ്ഥാപിക്കുക തുടങ്ങി ഏറ്റവും പ്രത്യക്ഷമായി രോഗികളെ ബാധിക്കുന്ന വിഷയങ്ങളുമായി ബന്ധപ്പെട്ടാണ് പ്രതിഷേധം സംഘടിപ്പിച്ചത്.
പ്രതിഷേധത്തിന് ബ്ലോക്ക് സെക്രട്ടറി എൻ.ബിജീഷ്, പ്രസിഡൻ്റ് കെ കെ സതീഷ്ബാബു, ട്രഷറർ പി.വി അനുഷ, ദിനൂപ് സി.കെ, ടി.കെ പ്രദീപ്, കീർത്തന, നവതേജ് മോഹൻ എന്നിവർ നേതൃത്വം നല്കി. ഈ ആവിശ്യങ്ങൾ അടിയന്തിരമായി പരിഗണിച്ചില്ലങ്കിൽ പ്രത്യക്ഷ സമരത്തിന് ഡി.വൈ.എഫ്.ഐ നേതൃത്വം നല്കും.
