മുൻ മുഖ്യമന്ത്രിയും സി.പി.എം. നേതാവുമായിരുന്ന ഇ.കെ. നായനാരുടെ 20-ാം ചരമവാർഷികദിനം 19-ന് വിപുലമായി ആചരിക്കും. നായനാർദിനാചരണത്തിന്റെ ഭാഗമായി കണ്ണൂർ ജില്ലയിൽ 18, 19 തീയതികളിൽ സി.പി.എം. നേതൃത്വത്തിൽ മഴക്കാലപൂർവ ശുചീകരണ പ്രവർത്തനം നടത്തും. തദ്ദേശസ്ഥാപനങ്ങളുമായി സഹകരിച്ചായിരിക്കും ഇതെന്ന് സി.പി.എം. ജില്ലാ സെക്രട്ടറി എം.വി. ജയരാജൻ പത്രസമ്മേളനത്തിൽ അറിയിച്ചു.
19-ന് രാവിലെ എട്ടിന് പയ്യാമ്പലത്തെ നായനാർ സ്മൃതിമണ്ഡപത്തിലെ പുഷ്പാർച്ചയിൽ സി.പി.എം. സംസ്ഥാന സെക്രട്ടറി എം.വി. ഗോവിന്ദനും മറ്റു നേതാക്കളും നായനാരുടെ കുടുംബാംഗങ്ങളും പങ്കെടുക്കും. അതിനുശേഷം ബർണശ്ശേരി നായനാർ അക്കാദമിയിൽ അനുസ്മരണ പരിപാടി നടക്കും.
തുടർന്ന് നായനാർ മ്യൂസിയം ജനങ്ങൾക്കായി തുറന്നുകൊടുക്കും. മ്യൂസിയത്തിന്റെ ഒന്നാംഘട്ടത്തിന്റെ ഭാഗമായി ഒരുക്കിയ സംവിധാനങ്ങൾ ജനങ്ങൾക്ക്‌ കാണാനാകും. നിർമിതബുദ്ധി ഉപയോഗിച്ച് തയ്യാറാക്കിയ നായനാരുമായി സന്ദർശകർക്ക്‌ സംസാരിക്കാം. ‘നായനാരോട്‌ ചോദിക്കാം’ ഫോൺ ഇൻ പരിപാടിയും ഇവിടെ ഒരുക്കിയിട്ടുണ്ട്‌.
പാർട്ടിയുടെ ആദ്യകാല നേതാക്കളായ പി. കൃഷ്ണപിള്ള, ഇ.എം.എസ്‌., എൻ.സി. ശേഖർ, എ.കെ.ജി., നായനാർ എന്നിവരുടെ സിലിക്കോണിൽ നിർമിച്ച ജീവൻ തുടിക്കുന്ന പ്രതിമ, പഴയകാല പോരാട്ടങ്ങളുടെ ഏഴ്‌ മിനിട്ട്‌ ദൈർഘ്യമുള്ള ഹ്രസ്വചിത്രം, നായനാർ ഉപയോഗിച്ച പേന, കണ്ണട തുടങ്ങിയവയുടെ പ്രദർശനം, രക്തസാക്ഷികളുടെ ഫോട്ടോയും പേരും വർഷവും ഉൾപ്പെടെയുള്ള വിശദാംശങ്ങളുടെ രക്തസാക്ഷി ഭിത്തി, സാർവദേശീയ തൊഴിലാളി പോരാട്ടത്തിന്റെ പ്രതീകമായ 30 അടിയുള്ള മുഷ്ടിചരുട്ടിയ പ്രതിമ, ലോബിയിലെ മുഖത്തളം എന്നിവയാണ്‌ മ്യൂസിയത്തിലെ കാഴ്ചകൾ.
