കോഴിക്കോട്: നവവധുവിനെ ഭര്‍ത്താവ് മര്‍ദിച്ചതായി പരാതി. സംഭവത്തില്‍ യുവതിയുടെ ഭര്‍ത്താവായ കോഴിക്കോട് പന്തീരാങ്കാവ് സ്വദേശി രാഹുലിനെതിരേ ഗാര്‍ഹിക പീഡനത്തിന് പോലീസ് കേസെടുത്തു.
ഈ മാസം അഞ്ചിനാണ് രാഹുലും എറണാകുളം സ്വദേശിനിയായ യുവതിയും വിവാഹിതരായത്. ഇതുമായി ബന്ധപ്പെട്ട സത്ക്കാരചടങ്ങ് കോഴിക്കോട്ടെ വീട്ടില്‍ നടന്നിരുന്നു. ചടങ്ങിനെത്തിയ വീട്ടുകാര്‍ യുവതിയുടെ മുഖത്ത് മര്‍ദനമേറ്റ പാടുകള്‍ കണ്ട് വിവരം തിരക്കുകയും ഇതോടെ ഇവര്‍ മര്‍ദന വിവരം വീട്ടുകാരെ അറിയിക്കുകയുമായിരുന്നു. തുടർന്ന് വീട്ടുകാര്‍ പോലീസില്‍ പരാതി നൽകി.
സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്. അതേസമയം വിവാഹബന്ധം തുടരാന്‍ താത്പര്യമില്ലെന്ന് അറിയിച്ച് യുവതി സ്വന്തം വീട്ടിലേക്ക് മടങ്ങി.
