റെയിൽവേയുടെ യുടിഎസ് മൊബൈൽ ആപ്പ് ഉപയോഗിച്ച് ജനറൽ ടിക്കറ്റും ഓൺലൈനായി ബുക്ക് ചെയ്യാം. ഈ ആപ്പ് വഴി റെയിൽവേ യാത്രക്കാർക്ക് ജനറൽ ടിക്കറ്റുകളും, പ്ലാറ്റ്‌ഫോം, സീസൺ ടിക്കറ്റുകളും എടുക്കാനുള്ള സംവിധാനമുണ്ട്.
പ്ലേ സ്റ്റോറിൽ നിന്നും യുടിഎസ് ആപ്പ് ഇൻസ്റ്റാൾ ചെയ്തതിനുശേഷം ആവശ്യമുള്ള വിശദാംശങ്ങൾ നൽകി സൈൻ അപ്പ് ചെയ്ത് രജിസ്റ്റർ ചെയ്യുക. യുപിഐ , നെറ്റ് ബാങ്കിംഗ്, ക്രെഡിറ്റ് കാർഡ് അല്ലെങ്കിൽ ഡെബിറ്റ് കാർഡ് വഴി നിങ്ങളുടെ R-വാലറ്റ് റീചാർജ് ചെയ്യണം. യുടിഎസ് ആപ്പിന്റെ ഉപയോക്താക്കൾക്ക് R-വാലറ്റ് ചാർജിൽ നിന്നും 3% ബോണസ് ലഭിക്കും.
ട്രെയിൻ ടിക്കറ്റ് ബുക്കിംഗ് ആരംഭിക്കുന്നതിന്, ആദ്യം പേപ്പർലെസ് അല്ലെങ്കിൽ പേപ്പർ ടിക്കറ്റ് ഓപ്ഷനുകളിലൊന്ന് തിരഞ്ഞെടുക്കുക. പുറപ്പെടുന്ന സ്റ്റേഷൻ, എത്തിച്ചേരേണ്ട സ്റ്റേഷൻ എന്നീ വിശദാംശങ്ങൾ നൽകുക.ആർ വാലറ്റിൽ നിന്നോ, യുപിഐ, നെറ്റ് ബാങ്കിംഗ്, ക്രെഡിറ്റ് കാർഡ് അല്ലെങ്കിൽ ഡെബിറ്റ് കാർഡ് പോലുള്ള മറ്റ് പേയ്മെന്റ് ഓപ്ഷനുകൾ മുഖേനയോ പണമടയ്ക്കുക.
യുടിഎസ് ആപ്പിലെ ‘ഷോ ടിക്കറ്റ്’ ഓപ്ഷൻ തിരഞ്ഞെടുത്താൽ നിങ്ങളുടെ ടിക്കറ്റുകൾ കാണാൻ കഴിയും. പേപ്പർ ടിക്കറ്റാണ് നിങ്ങൾ തെരഞ്ഞെടുത്തതെങ്കിൽ ബുക്കിങ് ഐഡി ഉപയോഗിച്ച്, ജനറൽ ടിക്കറ്റ് കൗണ്ടറിൽ നിന്നോ, റെയിൽവെ സ്റ്റേഷനിലെ ടിക്കറ്റ് വെൻഡിങ് മെഷിനിൽ നിന്നോ ടിക്കറ്റ് പ്രിന്റ് എടുക്കാവുന്നതാണ്.
