വടകര: വടകര ലോക്സഭാ മണ്ഡലം ഇടതുപക്ഷ ജനാധിപത്യ മുന്നണി സ്ഥാനാർഥി കെ കെ ശൈലജക്ക് വോട്ട് അഭ്യർഥിച്ച് വടകരയിൽ വനിതകളുടെ മഹാറാലി നടന്നു. എൽ.ഡി.ഡബ്ല്യു.എഫ് വടകര പാർലമെൻ്റ് മണ്ഡലം കമ്മിറ്റിയുടെ നേതൃത്വത്തിൽ വടകര കോട്ടപ്പറമ്പിൽ നിന്ന് ആരംഭിച്ച റാലിയിൽ ആയിരക്കണക്കിന് വനിതകൾ പങ്കാളികളായി. വടകരയിലെ വനിതകൾ ടീച്ചർക്കൊപ്പമാണെന്ന് പ്രഖ്യാപിച്ച് നടന്ന റാലി സി.പി.ഐ. എം പോളിറ്റ് ബ്യൂറോ അംഗം ബൃന്ദ കാരാട്ട് ഉദ്ഘാടനം ചെയ്തു.
നാരായണ നഗരം സ്റ്റേഡിയത്തിൽ നടന്ന സമാപന പരിപാടിയിൽ ഒ.പി. ഷീജ അധ്യക്ഷയായി. സ്ഥാനാർഥി കെ.കെ. ശൈലജ, ജനാധിപത്യ മഹിളാ അസോസിയേഷൻ അഖിലേന്ത്യാ പ്രസിഡന്റ് പി. കെ ശ്രീമതി, കെ.കെ ലതിക, കാനത്തിൽ ജമീല എം.എൽ.എ, ഇ. എസ് ബിജിമോൾ, അജിത കുന്നത്ത്, അഡ്വ. ബിനിഷ, ഖദീജ ടീച്ചർ തുടങ്ങിയവർ സംസാരിച്ചു. കെ. പുഷ്പ ജ സ്വാഗതം പറഞ്ഞു. തുടർന്ന് കലാമണ്ഡലം ഐശ്വര്യയുടെ ‘നിറയെ ചുവന്ന പൂക്കൾ’ എന്ന നൃത്ത കലാരൂപവും അരങ്ങേറി.
