അധ്യാപകനു നേരെ നടന്ന അക്രമം പ്രതിഷേധാർഹം: കെ പി എസ് ടി എ

നരിപ്പറ്റ യു.പി സ്കൂൾ അധ്യാപകൻ എം .പി. അശ്വിനെ സ്കൂൾ പരിസരത്തു വെച്ച് ഒരു കൂട്ടം ആളുകൾ അതിക്രൂരമായി മർദ്ദിച്ച നടപടി പ്രതിഷേധാർഹമാണെന്നും പ്രതികൾക്കെതിരെ കർശന നടപടി സ്വീകരിക്കണമെന്നും കെ പി എസ് ടി എ കുന്നുമ്മൽ ഉപജില്ല കമ്മിറ്റി ആവശ്യപ്പെട്ടു. സ്കൂളിൽ വെച്ച് അധ്യാപകൻ്റെ കാറിൻ്റെ ടയർ കുട്ടിയുടെ കാലിൽ തട്ടിയിരുന്നു. പരിക്കേറ്റ കുട്ടിക്ക് ചികിത്സ ലഭ്യമാക്കുകയും ചെയ്തിരുന്നു. സംഭവവുമായി ബന്ധപ്പെട്ട് സർവ്വകക്ഷി മധ്യസ്ഥയോഗത്തിനു ശേഷം വീട്ടിലേക്ക് പോകുകയായിരുന്ന അധ്യാപകനെയാണ് പിതാവിൻ്റെ കൺമുന്നിൽ വെച്ച് മൃഗീയമായി അക്രമിച്ചത്. അധ്യാപകർക്ക് ഭയം കൂടാതെ ജോലി ചെയ്യാനുള്ള സാഹചര്യം ഒരുക്കണമെന്നും കെപിഎസ് ടി എ ആവശ്യപ്പെട്ടു. നേതാക്കൾ പരിക്കേറ്റ് വീട്ടിൽ ചികിത്സയിൽ കഴിയുന്ന അശ്വിനെ സന്ദർശിച്ചു. യോഗത്തിൽ ജി.കെ.വരുൺ കുമാർ അദ്ധ്യക്ഷനായി. കെ പി എസ് ടി എ സംസ്ഥാന കമ്മിറ്റി അംഗം പി. രഞ്ജിത്ത് കുമാർ, മനോജ് കൈവേലി, വി. വിജേഷ്, പി.പി. ദിനേശൻ, അനൂപ് കാരപ്പറ്റ, ഇ.ഉഷ, ടി.വി. രാഹുൽ, പി.സാജിദ്, ഹാരിസ് വടക്കയിൽ തുടങ്ങിയവർ സംസാരിച്ചു.