കവിതയ്ക്കുള്ള 2024 ലെ കേരള സാഹിത്യ അക്കാദമി അവാർഡ് നേടിയ കൽപ്പറ്റ നാരായണനെ കൊയിലാണ്ടി പൗരാവലി ആദരിച്ചു. ‘ഒരു പുക കൂടി ‘ എന്ന കല്പറ്റക്കവിതയുടെ രംഗാവിഷ്ക്കാരത്തോടെ പരിപാടി ആരംഭിച്ചു. എഴുത്തുകാരനും പ്രഭാഷകനുമായ സുനിൽ പി. ഇളയിടം പരിപാടി ഉദ്ഘാടനം ചെയ്തു. കൊയിലാണ്ടി നഗരസഭ മുൻ അദ്ധ്യക്ഷയും ശ്രദ്ധ നിർവ്വാഹക സമിതി അംഗവുമായ കെ. ശാന്ത സ്വാഗതമാശംസിച്ചു. പാഠഭേദം എഡിറ്ററും സാമൂഹ്യ പ്രവർത്തകനുമായ വിജയരാഘവൻ ചേലിയ അധ്യക്ഷത വഹിച്ചു. വ്യവസ്ഥിതിക്കും മുഖ്യധാരക്കും അപ്രിയനാവാനുള്ള ധൈര്യം കൽപ്പറ്റയെ വ്യത്യസ്ഥനാക്കുന്നുവെന്ന് ഉദ്ഘാടന പ്രസംഗത്തിൽ സുനിൽ.പി. ഇളയിടം പറഞ്ഞു. “എൻ്റെ കാവ്യാഭിരുചിയേയും ധാരണകളെയും സ്വാധീനിച്ച വ്യക്തികളിൽ ഒരാളാണ് കൽപ്പറ്റയെന്നും 30 വർഷത്തിലേറെയായി കല്പറ്റയുടെ എഴുത്തിനെ പിന്തുടരുന്നുവെന്നും സുനിൽ പി ഇളയിടം പറഞ്ഞു. ഗായകൻ വി.ടി.മുരളി കല്പറ്റ നാരായണന് കൊയിലാണ്ടി പൗരാവലിയുടെ പേരിൽ മൊമെൻ്റൊ സമ്മാനിച്ചു.
എഴുത്തുകാരനും പ്രഭാഷകനുമായ രാജേന്ദ്രൻ എടത്തുംകര മുഖ്യപ്രഭാഷണം നടത്തി.
കവി സത്യചന്ദ്രൻ പൊയിൽക്കാവ്, യു.കെ.രാഘവൻ , മോഹനൻ നടുവത്തൂർ, വിജേഷ് അരവിന്ദ്, ശിവദാസ് പൊയിൽക്കാവ്, ടി.ടി. ഇസ്മയിൽ, അജയ് ആവള, ഡോ.എൻ.വി.സദാനന്ദൻ, അബ്ദുൾ റഹിമാൻ.വി.ടി, ശിഹാബുദ്ദീൻ.എസ്.പി.എച്ച്, എൻ.വി.ബിജു, വിനയചന്ദ്രൻ എന്നിവർ സംസാരിച്ചു. വിവിധ കലാ-സാംസ്ക്കാരിക സംഘടനകളും കല്പറ്റ നാരായണനെ വേദിയിൽ ആദരിച്ചു. സംഘാടക സമിതി ജനറൽ കൺവീനർ എൻ.കെ. മുരളി നന്ദി പറഞ്ഞു.
