മേപ്പയൂർ ജി.വി.എച്ച്.എസിൽ വൊക്കേഷണൽ ഹയർ സെക്കന്ററി കാർഷിക വിദ്യാർത്ഥികൾ മഴക്കാല പച്ചക്കറി കൃഷി ആരംഭിച്ചു. ജി.വി.എച്ച്.എസ് മേപ്പയൂരിലെ വൊക്കേഷണൽ ഹയർ സെക്കന്ററി വിദ്യാർത്ഥികൾ മഴക്കാല പച്ചക്കറി കൃഷി ആരംഭിച്ചു. മേപ്പയൂർ പഞ്ചായത്ത് കൃഷിഭവനും വൊക്കേഷണൽ ഹയർ സെക്കന്ററിയും സംയുക്തമായി നടത്തിയ പരിപാടി മേപ്പയൂർ പഞ്ചായത്ത് പ്രസിഡന്റ് കെ ടി രാജൻ പച്ചക്കറി തൈകൾ നട്ടുകൊണ്ട് ഉദ്ഘാടനം നിർവഹിച്ചു. വൈസ് പ്രസിഡന്റ് എൻ പി ശോഭ അദ്ധ്യക്ഷത വഹിച്ച ചടങ്ങിൽ മേപ്പയൂർ കൃഷി ഓഫീസർ ഡോ. അപർണ ആർ എ പദ്ധതി വിശദീകരിച്ചു.
വൊക്കേഷണൽ ഹയർ സെക്കന്ററിയിലെ കാർഷിക വിദ്യാർത്ഥികളും എൻ എസ് എസ് യൂണിറ്റ് വിദ്യാർത്ഥികളും ചേർന്നാണ് കൃഷി തോട്ടം ഒരുക്കിയത്. പച്ചക്കറി കൃഷി ചെയ്തു പഠിക്കുന്നതിനോടൊപ്പം മണ്ണിനെ പറ്റിയും ശാസ്ത്രീയ കൃഷി മുറകളെ പറ്റിയും പഠിച്ച് കൃഷിയെ അടുത്തറിയുക എന്നതാണ് പദ്ധതി കൊണ്ട് ഉദ്ദേശിക്കുന്നത്.
പി ടി എ പ്രസിഡന്റ് വി. പി ബിജു, കൃഷി അസിസ്റ്റന്റ് സ്നേഹ സി .എസ്, എസ് എം സി ചെയർമാൻ സുധാകരൻ പുതുക്കുളങ്ങര എന്നിവർ പരിപാടിക്ക് ആശംസകൾ അറിയിച്ചു. വൊക്കേഷണൽ ഹയർ സെക്കന്ററി പ്രിൻസിപ്പാൾ ആർ അർച്ചന സ്വാഗതം പറഞ്ഞ ചടങ്ങിൽ വിദ്യാർത്ഥി പ്രതിനിധി ദേവദർശൻ നന്ദി പറഞ്ഞു.
